ANAK SA DIOS

ANAK SA DIOS

LESSON TEN: SALVATION SERIES

“Hinuon, may midawat ug mituo kaniya; busa sila gihatagan niya sa katungod nga mahimong mga anak sa Dios. Wala sila mahimong mga anak sa Dios sa paagi nga tawhanon – wala sila mangatawo nga mga anak sa tawhanong amahan, kay ang Dios mao ang ilang Amahan.”                                                                                Juan 1:12-13

Si Jesus mianhi aron pagluwas kanato gikan sa sala, panulay, tunglo, ug kamatayon. Apan labaw niining tanan mianhi usab siya aron paghimo kanatong mga anak sa Dios ug pagpaila nga ang Dios ato nang Amahan. Pinaagi kaniya nahiusa na kita sa atong Langitnon nga Amahan (Juan 14:6; 1 Juan 2:23). Karon nga mga anak na kita sa Dios unsa may atong ibalos (response) ngadto sa iyang dakong gugma kanato? Adunay mga gitudlo ang atong Ginoong Jesus sa Biblia unsaon nato pagkinabuhi isip mga anak sa Dios.

TUNGOD KAY MGA ANAK NA KITA SA DIOS…

1.      Kinahanglan Makita ang kinaiya sa atong Amahan nganhi kanato.

Sama nga si Jesus mipadayag sa kinaiya sa Amahan ngadto sa uban (Juan 14:7-10) kita usab mopadayag sa kinaiyahan sa Amahan ngadto sa mga tawo nga nagpalibot kanato. Ang mga dili magtutuo dili makabuhat niini tungod kay wala pa sila nagbaton sa kinaiyahan sa Dios hinuon sa kinaiyahan ni Satanas nga mao ang amahan sa tanang bakakon (Juan 8:44). Pero kita nga mga anak sa Dios nakabaton na sa kinaiyahan sa Dios (1 Juan 3:9) ug kinahanglan nga ato kining ipadayag ngadto sa uban aron sila modayeg sa atong Amahan sa Langit (Mateo 5:16). Dili mahimo nga ang atong kinabuhi ug kinaiya pareho lang gihapon sa mga wala pa sa Ginoo. Aduna gyuy dakong kalahian ang mga anak sa Dios ug ang mga anak sa Yawa (1 Juan 3:10). Lahi gyud ta nga nahiusa na sa atong Amahan sa langit. Kinahanglan moliwat gayod kita sa atong Amahan. Mao kini ang gitudlo ni Ginoong Jesus (Mateo 5:43-48).

2.      Kinahanglan nga ang tanan natong buhaton para sa pagpahimuot kaniya.

Ang motibo sa tanang gibuhat ni Jesus sa dihang nagpuyo siya dinhi sa kalibotan mao ang pagpahimuot sa iyang Amahan (Juan 8:29). Wala siya nangita ug pagdayeg sa tawo kondili ang pagdayeg sa iyang Amahan sa langit (Juan 5:41-44). Si Jesus mitudlo nga mao usab kini ang atong buhaton. Ang tanan natong buhaton para sa kahimayaan sa atong Amahan sa langit dili para sa tawo o para sa atong kaugalingon. Kung ato kining buhaton ang atong Amahan magaganti kanato (Mateo 6:1-4, 5-6, 16-18).

3.      Kinahanglan nato ipalalom ang atong relasyon kaniya.

Tungod kay aduna na kitay relasyon sa atong Amahan sa langit ato kining ipalalom pinaagi sa paghatag ug igong panahon dinha sa pakighinabi kaniya. Si Jesus miingon,”…sulod sa imong lawak, unya takpi ang pultahan, ug pag-ampo sa imong Amahan nga dili Makita”(Mateo 6:6). Mao kini ang ehemplo nga gipakita ni Jesus nganhi kanato sa Biblia. Una siya motrabaho ug moministeryo sa uban makighinabi usa siya sa iyang Amahan sa Langit (Marcos 1:35). Adunay mga panahon nga biyaan niya ang tanan ginabuhat para lang makighinabi sa iyang Amahan (Lukas 4:42;5:16;6:12).

4.      Kinahanglan maglakaw kita sa iyang hingpit nga kabubut-on.

Si Jesus miingon,”Dili ang tanan nga magtawag kanako ‘Ginoo,Ginoo,’ Makasulod sa Gingharian sa langit, kondili kadto lamang nagtuman sa kabubut-on sa akong Amahan nga atua sa langit”(Mateo 7:21). Ang tinuod nga mga anak sa Dios wala lang nagtinguha pagtuman sa kabubut-on sa ilang Amahan kondili nagtuman gayod. Ang ilang pag-ampo nga sila magalakaw kanunay sa hingpit nga kabubut-on sa Amahan (Mateo 6:10). Si Jesus nga atong modelo nagpakita usab kanato niini nga ehemplo. Mobuhat lang siya ug butang kung kini hingpit nga kabubut-on sa iyang Amahan sa langit (Juan 5:19).

5.      Kinahanglan mosalig kita sa atong mga adlaw-adlaw nga panginahanglan.

Si Jesus mitudlo kanato nga parte sa atong pag-ampo mao ang pagpangayo sa atong mga adlaw-adlaw nga panginahanglanon (Mateo 6:11). Ang parte sa mga anak mao ang pagpangayo ug ang parte sa Amahan mao ang pagtagbo unsay gipangayo (Mateo 7:7-11). (Wala kini nagpasabot nga dili na kita motrabaho apan atong sabton nga kung wala ang pabor sa Dios wala kitay mahimo.) Katungdanan sa Amahan ang pagtagbo sa mga panginahanglon sa ilang mga anak busa kinahanglan nga dili kita mabalaka (Mateo 6:25-32). Ang ato lang sigurohon nga anaa kita sa iyang hingpit nga kabubut-on aron anaa kita sa posisyon nga modawat sa iyang gusto ihatag kanato (Mateo 6:33).

6.      Kinahanglan maglakaw kita nga putli ug balaan sa iyang atubangan.

Tungod kay mga anak na kita sa Dios dumtan nato ang iyang mga ginadumtan ug higugmaon ang iyang mga gihigugma. Dumtan nato ang sala ug ang tanang daotan (1 tesalonica 5:21-22). Kung adunay sala sa atong kasingkasing kinahanglan ato kining hinulsolan ug ikompisal sa atong Amahan aron siya mopasaylo kanato ug mohinlo sa atong kasingkasing (Mateo 6:12; 1 Juan 1:9). Ayaw tugoti nga adunay sala sa imong kasingkasing nga magpabilin. Ayaw usab tugoti nga adunay tawo nga wala pa nimo napasaylo (Mateo 6:14-15). Pasayloa sila kay ang Amahan nagpasaylo naman kanimo diha ni Kristo (Efeso 4:32).

7.      Kinahanglan mangayo kita kanunay sa iyang panalipod.

Ang mga amahan mopanalipod gayod sa ilang mga anak gikan sa tanang daotan. Parte sa atong mga pag-ampo mao ang pagpangayo ug panalipod gikan sa atong Amahan sa langit (Mateo 6:13). Mangayo kita kaniya ug giya sa tanan natong mga lakaw ug ginabuhat aron dili kita maadto sa daotan ug mahulog sa tintasyon. Malipay siyang manalipod kanato gikan sa panulay.

8.      Kinahanglan ato siyang alagaran.

Ang tanang buotang mga anak mohatag ug kalipay sa ilang mga amahan pinaagi sa pagtabang unsay trabahoon sa panimalay. Sa nagpangidaron ug 12 si Jesus nagsugod na siya pag-apil sa trabaho sa iyang Amahan sa langit (Lukas 2:42,49). Si Jesus ang atong ehemplo. Mianhi siya aron pagbuhat sa katuyoan nga gisangon kaniya sa Amahan ug ang paghuman niini (Juan 4:34). Didto sa krus nahuman ni Jesus ang iyang misyon pagbayad sa tanang sala sa kalibotan. Ang tinuod nga mga anak sa Dios moalagad gyud sa ilang Amahan sama kang Jesus (Mateo6:24). Ang ilang panan-awon mao ang pagtigom ug bahandi didto sa langit (Mateo 6:19-21). Ang katuyoan sa mga anak sa Dios mao ang paghuman sa trabaho sa ilang Amahan sa langit dinhi sa yuta.

PAG-APLIKAR SA KAUGALINGON

·         Sa dihang atong nasabtan nga kita mga anak na sa Dios unsay nausab kanato?

·         Maayo ba kita nga anak sa Dios? Napataas ug nahimaya ba siya sa atong kinabuhi?

·         Maapektohan ba ang amahan kung ang anak nagpabadlong?