Pagsangkap Series 1

ANG KINABUHI HUMAN SA KAMATAYON

Lesson 1 : Salvation series

            Ang pisikal nga kamatayon mahitabo bisan asa, sulod o gawas sa imong panimalay. Kini moabot sa bisan unsang takna, buntag, hapon, gabii o kadlawon. Moabot kini sa tanang tawo, bata o tigulang, babaye o lalaki, dato o pobre, ilado o dili ilado. Walay pillion ang kamatayon. Nagkalainlain ang paagi sa pag-abot niini, sakit, aksidente, katalagman, gipatay, o bunga na sa katigulang. Ang kamatayon dili mapugngan sa bisan unsa, bitamina, medicina, paugnat sa kusog o saktong pagkaon, hinuon pwede kini mapataas niining mga butanga. Ang tawo moagi gayod ug pisikal nga kamatayon, gawas  kung maabtan siya sa pagbalik ni Kristo.

1.      UNSAY NAGHULAT HUMAN SA PISIKAL NGA KAMATAYON?

“…mamatay ang tagsatagsa sa makausa, ug tapos niana hukman siya sa Dios.”                  

                                                                                                        Hebreo 9:27

Ang “paghukom sa Dios” maoy mosunod human sa kamatayon. Ang matag kalag nga mopanaw niining kalibotana moatobang gayod sa Dios ug mohatag ug husay sa iyang kinabuhi.

2.      UNSA ANG PAGHUKOM?

“Ug nakita ko ang mga patay, inila ug dili inila, nga nagbarog atubangan sa trono. Gibuklad ang mga libro, ug may lain pa gayong librong gibuklad nga mao ang libro sa kinabuhi. Gihukman ang mga patay sumala sa ilang binuhatan nga nahisulat sa mga libro. Ang tanan kansang ngalan wala mahisulat sa libro sa kinabuhi gitambog ngadto sa linaw nga kalayo.”                                             Gipadayag 20:12,15

Ang “paghukom” mao ang panahon diin and Dios mohimog desisyon kung iya bang pasudlon ang usa ka tao o dili sa iyang Gingharian. Ang kamatayon usa ka pultahan ngadto sa laing lugar diin wala nay kahumanan (eternity). Aduna lay duha ka lugar nga puwede adtoan sa usa ka tawo nga namatay, langit o impiyerno (Lukas 16:1923). Kung ang Dios magahukom kanimo ngadto sa “impiyerno”, didto ka ug siya mohukom kanimo ngadto sa “langit,” langit ka. Walay tunga-tunga.

3.      GIUNSA PAGHULAGWAY SA BIBLIA ANG IMPIYERNO?

I.       Usa kini ka lugar diin ang yawa uban sa iyang mga anghel ug tanang mga makasasala pagasilotan.

“Unya moingon siya ngadto sa iyang wala, ‘Pahawa kamo kanako, kamong gipanghimaraot sa Dios! Ngadto kamo sa kalayo nga walay pagkapalong nga giandam alang sa Yawa ug sa iyang mga anghel!’”                              Mateo 25:41

Ang tanan nga talawan, ang mga mabudhion, ang mga malaw-ayon, ang mga mamumuno, ang mga makighilawason, ang mga salamangkiro, ang mga nagsimba ug mga diosdios, ug ang tanang bakakon mahiagom gayod sa linaw nga kalayo (Gipadayag 21:8). Mahulagway ba nimo, nga ang yawa, ang tanang demonyo ug ang tanang mga dautang tawo sa kalibotan imong makauban sa usa ka lugar hangtod sa kahangtoran? Mao kini ang mahitabo sa mga tawo nga mosupil sa Dios.

II.    Usa kini ka lugar diin adunay grabe kayo nga pag-antos ug kasakit.

a.      Aduna kini mga ulod nga dili mamatay ug kalayo nga dili mapalong

                                                                                             (Marcos 9:47-48)

b.      Didto ang grabe kayo nga panaghilak ug panagkagot sa mga ngipon

                                                                                              (Mateo 25:30).

c.       Didto mahinumdom ka sa imong kinabuhi samtang didto pa sa kalibotan

                                                                                              (Lukas 16:25).

Didto makabasol ang mga makasasaka pero dili na sila puwede makahinulsol. Mahinumdom sila sa mga panahon diin ilang giusik-usikan ang ilang kinabuhi sa pagpuyo sa sala. Manghilak sila ug magkagot ang ilang mga ngipon sa dihang ilang mahinumdoman ang mga pagmaymay nga gikan sa ilang mga minahal sa kinabuhi nga unta modulo na sila sa Dios ug magbag-o. Dinhi matuman ang panultihon nga, “walay pagbasol nga nag-una”

III.  Usa kini ka lugar diin ang mga makasasala hangtod sa kahangtoran pagasilotan ug mahimulag sa presensiya sa Dios.

“Mag-antos sila sa silot sa walay kataposang pagkalaglag ug ipahilayo sila sa presensiya sa Ginoo ug sa iyang mahimayaong gahom.”    2 Tesalonoca 1:9

Tinuod makahadlok ang mensahe mahitungod sa impiyerno pero usa kini ka mensahe sa gugma. Gugma, tungod kay ang Dios nagpahimangno kanato samtang dili pa ulahi ang tanan nga adunay lugar nga dili mayo, busa kinahanglan mosulod kita sa iyang pultahan ug molakaw sa iyang dalan aron makasulod sa lugar nga iyang giandam kanato, nga gitawag ug langit (Mateo 7:13-14; Filipos 3:20).

4.      GIUNSA PAGHULAGWAY SA BIBLIA ANG LANGIT?

I.       Usa kini ka lugar diin wala nay paghilak, kasakit, kasub-anan ug kamatayon.

“Pahiran niya ang ilang luha ug wala nay kamatayon ni kasubo, paghilak o kasakit, kay nahanaw na man ang daang mga butang.”                                                                                 Gipadayag 21:4

II.    Usa kini ka lugar diin wala nay daotan ug mga makasasala.

“Apan walay bisan unsa nga hugaw makasulod sa siyudad o bisan nga naghimog makauulawng buhat o nagbakak. Ang pasudlon sa siyudad mao lamang ang mga tawo kansang ngalan nahisulat sa libro sa kinabuhi sa Nating Karnero.”                                                                   Gipadayag 21:27

III. Usa kini ka lugar diin ang Dios makig-uban na kanato sa kahangtoran.

“Karon ang puloy-anan sa Dios ania na sa katawhan. Magpuyo na siya tipon kanila ug sila mahimong iyang katawhan. Ang Dios makig-uban kanila ug siya mahimo nga ilang Dios.”  

                                                                                                                                     Gipadayag 21:3

5.      KANUS-A KITA MAG-ANDAM NIINING KINABUHI NGA HUMAN SA KAMATAYON?

“ Ang dato mitubag, ‘kon mao kana. Amahan, hangyoon ko ikaw nga imo untang ipadala si Lazaro ngadto sa amo, diin ako may lima ka igsoong lalaki. Paadtoa siya aron sila kapasidan-an ug dili mahianhi dapit sa kasakitan.’”                                                                                           Lukas 16:27-28

Niini nga pasahe sa itaas mihangyo ang dato (namatay ug naadto sa impiyerno o Hades) nga ipadala si Lazaro (patay na apan naadto sa langit) ngadto sa iyang lima ka igsoon aron kapasidan-an sila samtang buhi pa aron dili mahiadto niining lugar sa kasakitan. Nasayod siya nga nagpuyo usab sila sa sala sama kaniya ug kung dili sila moduol sa Dios ug magbago mahiagom usab sila sa impiyerno sama kaniya. Kanus-a ba kita mag-andam sa umaabot nga kinabuhi? Karon, samtang buhi pa kita. Ayaw na hulata ang ugma basin ug ulahi na kayo ang tanan. Ang yawa gusto nga dili kita motuo nga ang “langit” ug “impiyerno” tinuod aron dili kita mangandam niining kinabuhia.

6.      UNSAON NATO PAG-ANDAM NIINING KINABUHI NGA UMAABOT?

“Si Abraham miingon, atua didto si Moises ug ang mga Propeta nga magpasidaan kanila; sila nay mahibalosa pagpamati sa ilang sulti. ‘Aang dato mitubag, ‘Apan Amahan, kana dili pa igo! Kon adunay mabanhaw ug moadto kanila, mamiya gayod sila sa ilang mga sala’. Apan miingon si Abraham, ‘Kon dili sila mamati kang Moises ug sa mga propeta, dili gayod sila makabig bisan pag may mabanhaw.”

                                                                                                            Lukas 16:29-31

Makita nato sa itaas nga mga bersikulo ang tubag ni Abraham sa hangyo sa dato nga ipadala si Lazaro balik sa kalibotan aron pahimangnoan ang iyang lima ka igsoon nga lalaki. Gusto sa dato nga aduna gayoy mabanhaw gikan sa mga patay aron sila motuo ug mobiya sa ilang mga sala. Apan giklaro ni Abraham sa dato nga aduna nay mga buhi nga alagad sa Dios nga nagawali sa mensahi sa Gingharian ngadto kanila ug kung dili sila maminaw wala nay mahimo aron pagluwas kanila. Unsaon nato pag-andam sa kinabuhi nga umaabot? “Kinahanglan maminaw kita sa mga tawo nga gigamit sa Dios aron pagpahimangno kanato ginamit ang iyang pulong nga mao ang Biblia.”

Ang umaabot nga mga pagtulon-an magtudlo kanato unsaon nga masiguro gayod nato ang kaluwasan. Busa ayaw pakyasa ang paghuman niini nga mga leksiyon aron maandam gayod kita sa ‘kinabuhi nga umaabot’ ug ‘masangkap aron pagtabang sa mga wala pa naluwas.‘ Karon ang pag-andam sa kaugalingon ug dili ugma kung patay na kita!

PAG-APLIKAR NGA MGA PANGUTAN:

·   Duna ka bay kahadlok nga moadto sa impiyerno? Ngano man?

·   Sigurado ka ba nga moadto sa langit kung ugaling kuhaon ka na sa Ginoo? Ngano man?