Kaluwasan - Pagsangkap

KALUWASAN

LESSON TWO : SALVATION SERIES

“Mao usab ang mahitungod kaninyo: sa pagkadungog ninyo sa matuod nga mensahe sa Maayong Balita nga naghatag kaninyog kaluwasan, mituo kamo kang Kristo. Busa gipatikan kamo sa Dios pinaagi sa paghatag kaninyo sa Espiritu Santo nga iyang gisaad, timaan nga kamo iya na.”                                                                                   

                                                                                                                                                 Efeso 1:13

Ang bersikulo nga atong gibasa nagsulti nga una kita makabaton ug “kaluwasan” kinahanglan ato usang madunggan ug tuohan ang mensahe sa Maayong Balita. Ang pasahe nagsulti nga kung atong dawaton ang mensahe sa kaluwasan nga mao si Kristo mapatikan kita sa Espiritu Santo timaan nga kita iya na sa Dios. Apan nganong kinahanglan man gayod kita maluwas? Unsa bay sayop kanato? Nganong motuo man gayod kita kang Kristo aron maluwas? Ato kining tubagon.

ADUNAY BABAG NGA NAGSEPARAR SA DIOS UG SA TAWO

Imo bang nabati nga ang Dios morag layo kayo sa imong kinabuhi? Kitang tanan gibati ug sama niini. Ang pagbati nga ang Dios layo kayo gibati sa tanan, tungod niini daghan ang nagtuo nga pinaagi sa relihiyon ug sa mga maayong buhat sila maduol sa Dios. Pero tungod kay ang pagkahimulag sa Dios dili pisikal – walay tawhanong binuhatan ang makapaduol kanato ngadto kaniya. Unsay hinungdan nga ang tawo nahimulag sa Dios?

“…ang inyo hinuong kalapasan maoy nag-ulang kaninyo ug sa inyong Dios; ang inyong sala maoy hinungdan sa iyang pagkahilayo kaninyo aron dili siya makadungog kaninyo.”

ANG SALA MAOY NAGPAHIMULAG SA TAWO GIKAN SA DIOS

Ang pagseparar sa Dios ug sa tawo klaro kaayo sa Biblia. Ang Dios balaan; ang tawo makasasala. Ang Dios maayo; ang tawo dautan. Nag-ingon ang pulong sa Dios nga, “Nakasala ang tanan ug nahilayo s a Dios” (Rom 3:23). Kamatayon o pagkahimulag sa presensiya sa Dios ang bayad sa sala (Roma 6:23).

ANG HUSTISYA SA DIOS NAGKINAHANGLAN UG SAKRIPISYO  ALANG SA SALA

Tungod kay ang Dios ‘matarong ug hustisya,’ dili niya matugotan ang sala nga dili masilotan. Tungod kay siya ‘mahigugmaon ug mangiluy-on,’ dili niya gusto nga ang tanang tawo mahimulag kaniya. Ang langitnon nga pagsulbad sa maong problema mao nga si Kristo Jesus, ang Bugtong Anak sa Dios maoy mahimong “sakripisyo para sa sala sa tibuok kalibutan.” Nag-ingon ang Hebreo 9:28, “Gihalad usab si Kristo sa makausa aron pagwagtang sa mga sala sa daghang tawo.” Siya ang,”…nating Karnero sa Dios nga nagwagtang sa sala sa kalibotan” (Juan 1:29). Ang Biblia nagsulti nga:

“Gihatag siya sa Dios aron pinaagi sa iyang kamatayon mapasaylo ang mga sala sa motuo kaniya. Niining paagiha gipakita sa Dios ang iyang hustisya bahin sa mga sala…..aron pagpakita nga siya matarong, ug himuon niyang matarong ang tanan nga motuo kang Jesus.”                                                                                                            

                                                                                                                                                  Roma 3:25-26

SI JESUS ANG MIBAYAD SA SILOT SA ATONG MGA SALA

Unsay nahitabo didto sa krus? Si Jesus ang mipuli sa atong dapit ug sa atong silot. Adunay panagkambiyo nga nahitabo didto sa krus. Iyang giangkon ang atong tunglo ug kapobrehon aron makadawat kita sa iyang panalangin ug kadato (Galacia 3:13-14; 2 Corinto 5:21). Tungod sa iyang kinabuhi nga walay sala, siya lang ang angayan nga mobayad sa silot sa sala sa tawo ug mopatunga sa Dios ug sa tawo. Tungod niini ang atong kaluwasan nabasi sa gibuhat ni Jesus didto sa krus ug dili unsay atong nabuhat para kaniya. Si Jesus lang ang nagbayad sa silot sa atong mga sala. Ang 2 Corinto 5:21 nagsulti nga, “Walay sala si Kristo, apan gipaambit siya sa Dios sa atong sala aron kita, sa atong pagkahiusa kaniya makaambit sa pagkamatarong sa Dios.”

MALUWAS KITA KUNG ATONG TALIKDAN ANG SALA UG MOSALIG KANG KRISTO

Kitang tanan nakasala batok sa balaan ug matarong nga Dios. Ang bayad sa sala mao ang pagkahimulag sa “buhi nga presensiya sa Dios” ug ang silot ngadto sa “impiyerno”. Ang Dios ‘hustisya’ ug mosilot gayod sa sala. Siya usab ‘mahigugmaon’ ug dili gusto nga kita mahimulag kaniya ug moadto sa impiyerno hangtod sa kahangtoran. Mao nga iyang gipadala ang iyang bugtong Anak nga si Jesu-Kristo para mobayad sa silot sa atong mga sala didto sa krus (Roma 5:8). Tungod sa iyang kinabuhi nga walay sala ang kamatayon wala makapugong kaniya. Nabanhaw siya gikan sa mga minatay sa ikatulo ka adlaw. Buhi si Jesus!

Ania siya karon ug andam mohatag ug kapasayloan niadtong andam maghinulsol sa ilang mga sala. Andam siya moluwas niadtong motugyan sa ilang mga kinabuhi ngadto kaniya. Ang mensahe sa Maayong Balita mao nga, “Dinha ni Kristo adunay kaluwasan sa sala ug pagpasig-uli ngadto sa Dios” (2 Corinto 5:19). Madawat nato ang kaluwasan kon moundang kita pagsalig sa atong kaugalingon ug atong ibutang ang atong pagsalig sa gibuhat ni Krist didto sa krus para kanato. Kinahanglan motuo kita nga siya Ginoo ug wala siya nagpabilin sa lubnganan. Nag-ingon ang Biblia sa Roma 10:9-10.

“Maluwas ka kon ipahayag mo nga si Jesus mao ang Ginoo, ug sa kinasingkasing motuo ka nga gibanhaw siya sa Dios. Kay mituo man kita sa kinasingkasing gayod, gimatarong kita sa Dios; ug naluwas kita kay gipahayag man nato kini.”

PAG-APLIKAR SA KAUGALINGON

Andam ka na bang mobiya sa sala ug motugyan sa imong kinabuhi ngadto kang Jesus?

Andam ka ba mosunod ug motuman kaniya sa tibuok nimong kinabuhi?

Andam ka na bang mo-ampo para madawat nimo ang kapasayloan ug kaluwasan?

PAG-AMPO PARA SA KALUWASAN

            Ginoong Jesus, nagaduol ako kanimo uban sa pagtuo nga ikaw ang gipadala sa Amahan aron pagbayad sa silot sa akong mga sala. Mituo ako sa imong gibuhat didto sa krus…mituo usab ako nga nabanhaw ka gikan sa minatay…buhi ka…ako kang dawaton karon isip Ginoo ug manluluwas sa akong kinabuhi…Ginoo, akong giangkon nga ako usa ka makasasala….pasayloa ako…hinloi ako…Ginoong Jesus, sulod sa akong kasingkasing pinaagi sa imong Espiritu…puy-I ako…sugod karon ikaw na ang akong tumanon ug alagaran…moundang na ako sa pagpakasala…Ginoo, isulat ang akong pangalan sa libro sa kinabuhi. Salamat Ginoong Jesus… nga dinha kanimo ako luwas na…dinha kanimo ako napasaylo na… dinha kanimo ako anak na sa Dios… dinha kanimo ako taga langit na ug wala nay labot sa impiyerno. Amen.