BAUTISMO SA TUBIG

BAUTISMO SA TUBIG

LESSON TWELVE : SALVATION SERIES

1.      UNSA ANG BAUTISMO SA TUBIG?

“Busa panlakaw kamo ngadto sa tanang katawhan sa tibuok kalibotan ug himoa sila nga akong mga tinun-an, ug bunyagi sila sa ngalan sa Amahan, sa Anak sa Espiritu Santo…”

Gimandoan ni Ginoong Jesus ang iyang mga disipolo nga manghimo ug mga tinun-an ug pagabautismohan kini sa tubig. Ang bautismo sa tubig usa ka sugo o mando nga gikan sa atong Ginoo para sa tanan niyang mga magtutuo ug tinun-an.

2.      UNSAY KAHULOGAN SA BAUTISMO SA TUBIG?

Ang pulong “bautismo´ sa Grego nga pinulongan mao ang “baptizo” nga ang kahulogan mao “ang pag-unlod” o sa English pa “to immerse”. Sa ato pa, ang pasabot sa bautismo sa tubig mao ”ang pag-unlod sa tubig”

3.      UNSAY KALAMBIGITAN NIINI SA ATONG PAGLAKAW DINHA NI KRISTO?

“Nasayod kamo nga sa pagbunyag kanato nahiusa kita kang Kristo Jesus, busa nahiusa kita sa iyang kamatayon. Tungod niini sa pagbunyag kanato gilubong kita uban kaniya ug miambit sa iyang kamatayon, aron ingon nga si Kristo gibanhaw sa mahimayaong gahom sa Amahan, kita usab magpuyo diha sa bag-ong kinabuhi.”

                                                                                                      Roma 6:34

Ang bautismo sa tubig nagsimbolo sa atong pagkahiusa kang Kristo sa iyang kamatayon, paglubong ug pagkabanhaw. Sa dihang i-unlod o ituslob kita sa tubig atong gilubong ang atong daan nga pagkatawo nga patay na diha ni Kristo ug sa dihang kita gihaw-as sa tubig nagsimbolo kini sa atong pagkaban-haw uban ni Kristo sa bag-ong kinabuhi. (Basaha ang Colosas 2:12-13).

4.      PAGABAUTISMOHAN BA ANG MGA BATA NGA WALA PAY BUOT?

Dili, tungod kay ang bautismo sa tubig para lang sa mga aduna nay pagsabot unsay kahulogan niini. Wala kay makitang bersikulo sa Biblia nga naghisgot nga adunay bata nga nabunyagan o nabautismohan. Ang mga bata sa Biblia ginahalad sa templo sama kang Jesus nga gihalad sa iyang ginikanan sa walo pa lang siya ka adlaw (Lukas 2:21-22)

5.      UNSAY MGA GIKINAHANGLAN ARON PUWEDE KA MABAUTISMOHAN?

i.                    Paghinulsol sa mga sala – “Ang tagsatagsa kaninyo kinahanglan maghinulsol ug magpabunyag…” (Buhat 2:38).

ii.                  Pagtuo kang Kristo – “Ang motuo ug magpabunyag…” (Marcos 16:16)

iii.                Pagsunod sa Ginoo – “Hiimoa sila nga akong mga tinun-an, ug bunyagi sila…” (Mateo 28:19).

Kung kita naghinulsol na, nagtuo ug nagsunod na sa Ginoo puwede na kita bautismohan sa tubig.

6.      MAKALUWAS BA ANG BAUTISMO SA TUBIG?

Dili, tungod kay ang kaluwasan mabatonan nato pinaagi sa atong pagtuo kang Ginoong Jesus (Buhat 16:31). Ang kaluwasan usa ka “gasa” gikan sa Dios ug dili kini makuha sa atong mga paningkamot, bisan ug magpabautismo pa kita (Efeso 2:8-9).

Adunay mga tawo nga nahisgutan sa Biblia nga ‘naluwas’ bisan ug wala mabautismohan sa tubig. Si Saqueo nga usa ka tikasan nakabaton ug dihadiha nga kaluwasan tungod sa iyang mahinulsol nga kasingkasing (Lukas 19:8-10) ug ang tulisan nga gilansang sa krus uban ni Jesus nga mituo nga siya ang Mesiyas (Lukas 23:40-43)

Dili makaluwas ang bautismo sa tubig, hinuon bunga kini sa atong kaluwasan.

7.      NGANONG KINAHANGLAN MAN KITA MAGPABAUTISMO?

Adunay tulo ka rason nganong kita magpabautismo sa tubig”

i.                    Aron pagtuman sa sugo sa atong Ginoo – atong nasabtan nga ang bautismo sa tubig mando gikan kang Kristo ngadto sa tanang sumosunod kaniya (Mateo 28:19)

ii.                  Aron Makita ang atong pagtuo – selyo kini sa atong pagtuo sa Ginoo (Marcos 16:16). Kung aduna kitay pagtuo magpabautismo gyud kita sa tubig (Buhat 8:12-13). Sama nga ang pagtuo nga walay buhat patay (Santiago 2:26), ang pagtuo sa Ginoo nga walay pagtuman sa ‘pagpabautismo sa tubig’ patay.

iii.                Aron atong masunod gayod si Kristo – si Jesus sa iyang kapanahonan nagpabautismo kang Juan aron pagtuman gayod sa tanang gisugo sa Amahan ngadto kaniya (Mateo 3:13-15). Nagpabautismo ang Ginoo aron kita nga sumosunod niya magpabautismo usab. Nagpabautismo man gain si Jesus kita pa kaha!

8.      SA UNSANG PANGALAN KITA PAGABAUTISMOHAN?

Ang mando ni Ginoong Jesus, nga pagabautismohan kita sa pangalan sa Amahan, sa Anak, ug sa Espiritu Santo (Mateo 28:19).

9.      KANUS-A KITA MAGPABAUTISMO?

Karon, sa dihang nakasabot na kita unsay kahulogan niini. Kung kita andam na mobiya ug molubong sa atong daang pagkatawo ug magkinabuhi na uban sa Ginoo andam na kita sa bautismo sa tubig. Kung ugaling masayop kita human sa bautismo sa tubig aduna na kitay mahinumduman nga ‘kita patay na sa sala ug bag-o nang binuhat dinha ni Kristo Jesus.’

PAG-APLIKAR NGA MGA PANGUTANA

• Nganong dili puwede bautismohan ang mga bata nga wala pay buot?
• Kinahanglan ba nga mahimo kitang hingpit o perpekto una kita magpabautismo?
• Andam ka na ba motuman sa mando sa Ginoo pagpabautismo sa tubig?