PAGKATAWO PAG-USAB

PAGKATAWO PAG-USAB

LESSON NINE – SALVATION SERIES

Una kita maghisgot unsa ang “pagkatawo pag-usab” o “born again”, ato usang pagahisgotan unsa ang mga sayop nga mga panghunahuna mahitungod niini. Una sa tanan ang “born again” dili sekta sa relihiyon nga puwede ka mobalhin para mahimong usa ka parte niini. Ang ‘born again’ dili pagbag-o sa kaugalingon pinaagi sa tawhanong paningkamot. Pipila kanato kung makakita ug tawo nga nagbag-o, maghunahuna dayon nga siya nag ‘born again’, pero kini nga panghunahuna sayop. Ang uban usab nagatuo nga kita na ‘born again’ sa dihang nabautismohan kita sa tubig pinaagi sa pagpisikpisik (para sa mga bata) o pinaagi sa pag-unlod (para sa mga dagko). Ilang gitan-aw ang pagka ‘born again’ nga usa ka gawas nga kasinatian pinaagi sa pagbautismo sa tubig. Kini nga pagtuo dili sibo sa Biblia. Ato lang gigamit ang pulong ‘born again’ sa itaas kay mao kini ang ilado kayo nga pulong pero ang Bisaya niini mao ang ‘pagkatawo pag-usab’ nga mao nay atong gamiton sa unahan.

1.      Unsa ang pagkatawo pag-usab?

“Wala sila mahimong mga anak sa Dios sa pinaagi nga tawhanon – wala sila mga tawo nga mga anak sa tawhanong amahan, kay ang Dios mismo mao ang ilang Amahan.”                                                                                                          Juan 1:13

Ang “pagkatawo pag-usab” usa ka kasinatian diin ang usa ka tawo natawo ngadto sa pamilya sa Dios. Kini nga pagkatawo espirituhanon, nga minugna sa Espiritu sa Dios. Nag-ingon ang Ginoo, “…ang gianak sa Espiritu, espiritu usab”(Juan 3:6). Ang ‘pagkatawo pag-usab’ dili sekta sa relihiyon, dili pagbag-o sa kaugalingon sa tawhanong mga pamaagi, o pagbautismo sa tubig kondili “espirituhanon nga pagkatawo ngadto sa Gingharian sa Dios.”

2.      Nganong kinahanglan man kita matawo sa pamilya sa Dios? Dili ba diay mga anak sa Dios ang tanang tawo sa kalibotan?

“Ang kalainan sa mga anak sa Dios ug sa mga anak sa yawa mao kini…”

Duha ka klase nga mga tawo

Tanang tawo binuhat sa Dios pero dili tanang tawo mga anak sa Dios. Atong Makita sa itaas nga bersikulo nga adunay mga tawo nga anak sa Dios ug adunay mga tawo nga mga anak sa Yawa. Si Jesus mitawag sa mga relihiyosong mga makasasala ug mga anak sa Yawa ang amahan sa tanang bakakon (Juan 8:44). Duha ka klase ang mga tawo sa tibuok kalibotan: mga anak sa Dios ug mga anak sa Yawa.

Duha ka klase nga pagkatao

Ang Biblia naghisgot  ug duha ka pagkatawo,”Ang gianak sa tawo, tawo usab; ug ang gianak sa Espiritu, espiritu usab”(Juan 3:6). Ang tawhanon nga pagkatawo (pagkatawo sa tubig) ug ang espirituhanon nga pagkatawo (pagkatawo sa espiritu)(Juan 3:5). Ang unang pagkatawo nahitabo sa dihang natawo kita sa tago-angkan sa atong inahan. Niini nga pagkatawo adunay “panubigon” (bag of water). Niining unang pagkatawo, natawo kita uban sa ‘panulondon nga sala’ (Salmo 51:5). Ato kining napanunod kang Adan diin ang iyang sala ug pagkamakasasala napasa sa tanang kaliwatan (Roma 5:12).

Ang sala ug kamatayon napasa ngadto sa tanang tawo busa mao na kini ang kahimtang sa mga tawo sa kalibotan (Galacia 3:22). Wala nagpasabot nga ang mga bata kung mamatay moadto sa impeyerno, tungod kay wala pa silay buot ug wala pa sila sa edad diin manubag sila sa ilang mga binuhatan (age of accountability) busa ang Gingharian sa Dios alang kanila (Mateo 19:14). Pero ang kamatuoran tanang tawo makasasala ug tungod niini…

              i.      Patay sila sa espiritu (Efeso 2:1).

            ii.      Iya sila sa Yawa (Efeso 2:2; 1 Juan 3:8)

          iii.      Padulong sila sa impiyerno (Mateo 25:41)

Mao kini ang pinakarason nganong miingon si Jesus nga kinahanglan matawo kita pag-usab. Katulo kini gibalikbalik ni Jesus sa iyang pakighinabi ni Necodemo busa importante gayod kini kaayo (Juan 3:3,5,7). Natawo ka nga patay sa espiritu, kinahanglan matawo ka pag-usab aron mabuhi sa espirituhanon nga bahin.Tungod sa sala iya ka sa yawa, mao nga kinahanglan ka matawo pag-usab aron mahiusa sa Amahan sa langit ug mahimong iyang anak. Natawo ka nga makasasala kinahanglan matawo ka pag-usab aron mahimong matarong. Tungod sa sala ang imong padulngan kalaglagan, mao nga kinahanglan ka matawo pag-usab aron makabaton ug kasigurohan sa Gingharian sa Dios (Juan 3:3).

3.      Unsaon nato para matawo kita pag-usab?

“Hinuon, may midawat ug mituo kaniya; busa sila gihatagan niya ug katungod nga mahimong mga anak sa Dios. Wala sila mahimong anak sa Dios sa paagi nga tawhanong Amahan, kay ang Dios mismo mao ang ilang amahan.”   Juan 1:12-13

Matawo ka pag-usab kung imong ibutang ang imong pagtuo ug pagsalig ngadto kang Jesus para kapasayloan sa imong mga sala ug sa kompleto nga pagkahiusa ngadto sa Dios nga Amahan. Kung ang usa ka tawo motugyan sa iyang kinabuhi ngadto kang Jesus matawo siya pag-usab ngadto sa pamilya sa Dios. Nag-ingon ang Biblia,”Pinaagi sa pagtuo kamong tanan nahimong mga anak sa Dios sa pagpakighiusa ninyo kang Kristo Jesus”(Galacia 3:26). Pinaagi sa atong pagtuo kang Jesus nahimo kitang mga anak sa Dios ug ang Dios nahimong ato nang Amahan!

4.      Unsa may mosunod human kita matawo sa pamilya sa Dios?

Si Apostol Pablo mitawag sa mga Kristohanon sa Corinto nga mga bata pa dinha ni Kristo (1 Corinto 3:1). Sa dihang natawo kita niining kalibotana, natawo kita nga mga bata ug dili mga hamtong na. Mao gihapon sa espirituhanon nga bahin. Sa dihang natawo kita ngadto sa pamilya sa Dios natawo kita nga mga “bata pa sa Ginoo” ug dili mga “hamtong na sa Ginoo.” Busa human kita matawo ngadto sa pamilya sa Dios kinahanglan motubo kita ug mohamtong diha ni Kristo. Ang kausaban kinahanglan mosunod human kita maluwas.

PAG-APLIKAR NGA MGA PANGUTANA:

• Siguro ka na ba nga ikaw anak na sa Dios? Ngano man?
• Unsay mga kalahian sa mga bata pa sa Ginoo ug kadtong mga hamtong na?
• Unsa mga benepisyo kung hamtong na kita nga mga Kristohanon?
• Unsay atong buhaton aron motubo ug mohamtong kita diha sa Ginoo?