LANGITNONG AMAHAN

LANGITNONG AMAHAN

LESSON ELEVEN : SALVATION SERIES

ADUNAY DUHA KA KATUYOAN NGANONG MIANHI SI JESUS SA KALIBOTAN

1.      Pagluwas kanato gikan sa sala ug paghiusa kanato ngadto sa Dios

Ang unang katuyoan nganong mianhi si Jesus sa kalibotan mao ang pagluwas kanato sa sala nga nagdala ug kamatayon ug paghiusa kanato sa Dios (Mateo 1:21; Lukas 19:10;2 Corinto 5:19). Mao kini ang iyang gibuhat didto sa krus.

2.      Pagpaila sa Dios nga usa ka Amahan.

Dili igo ang pag-ila kang Jesus tungod kay siya mianhi aron madala kita ngadto sa Amahan. Si Jesus ang dalan paingon sa Amahan (Juan 14:6). Ang ‘dalan’ dili mao ang kataposan hinuon mohatod kini kanato sa usa ka ‘destinasyon’. Si Jesus ang dalan nga mohatod kanato ngadto sa destinasyon nga mao ang Amahan.

Si Jesus mipaila sa ngalan sa Dios sa iyang mga disipolo (Juan 17:6,26). Dili kini ang pangalang “ELOHIM” o ang pangalang “JEHOVA” tungod kay ang mga Judeo dugay nang nakaila niini nga pangalan. Usa kini nga pangalan? AMAHAN. Niini nga kapitulo (Juan 17) sa pag-ampo ni Jesus ka unom niya gitawag ang Dios nga Amahan. Sa libro sa Juan adunay 122 ka bisis nga gitawag ang Dios ug “Amahan”.

Sa nanglabay’ng panahon nakig-istorya ang Dios kanato pinaagi sa mga propeta apan niining kataposang adlaw nakig-istorya siya pinaagi sa iyang Anak (Hebreo 1:1-2). Ang Anak sa Dios adunay mensahe nga wala mawali sa mga nanglabay’ng mga mensahero – ug ang mensahe mao nga, ‘ siya ang anak nga gipadala sa iyang Amahan sa langit aron paghatag ug kinabuhi sa tanan nga mutuo kaniya’ (Juan 5:36-40). Kung sila motuo ug modawat kaniya mahimo usab silang mga anak sa Dios ug ang Dios mahimo na usab nga ilang Amahan (Juan 1:12-13; Galacia 3:26; Juan 20:17).

Miingon si Jesus nga walay nakaila sa Amahan gawas kaniya ug makaila lang kita sa Amahan kung iya kitang padaygan niini (Mateo 11:27). Si Kristo lang ang makapaila sa Dios nga Amahan nganhi kanato ug wala nay lain. Mianhi siya pagpaila sa Amahan!

Si Jesus mipaila sa Langitnong Amahan ngadto sa iyang mga tinun-an dili lang sa pagtudlo ug pagwali bahin sa Amahan kondili pinaagi sa iyang pagkinabuhi. Ang kinaiya ug himaya sa Amahan napasundayag diha sa Anak. Kinsa kadtong nakakita kaniya nakakita na sa Amahan (Juan 14:8-11). Si Jesus ang Anak sa Dios mao ang hulagway sa Amahan sa Langit.

Si Jesus nagkinabuhi kanunay sa Dios isip usa ka Anak ngadto sa Amahan (Juan 11:41; 17:1). Makita nato sa Biblia nga si Jesus kanunay motawag sa Dios nga “Amahan”.

Gitudloan usab kita niya pagbuhat niini sa atong mga pag-ampo. Nag-ingon siya,”Ingna niini pag-ampo:’Amahan namo nga anaa sa langit’” (Mateo 6:9). Mao usab kini ang gitudlo ni Apostol Pablo nga,”tawgon nato ang Dios nga Amahan” (Efeso 5:20). Kung imong tan-awon pag-ayo ang mga manunulat sa Bag-ong Tugon, sila nagtudlo nga ang Dios usa ka Amahan ug angayan nga tawgon ug ilhon nato siya nga Amahan.

GIUNSA PAGHULAGWAY ANG ATONG LANGITNONG AMAHAN SA BIBLIA?

1.      Maayo siya nga Amahan

“Ang tanan mayo ug hingpit nga gasa naggikan sa langit; gikan kini sa Amahan nga maoy nagbuhat sa mga kahayag diha sa langit. Dili gayod siya mausab ni magpakita ug landing sa pagkausab.”                                                     Santiago 1:17

Dili siya mohatag ug sakit, kapobrehon, ug kadaot kay Amahan siya sa panalangin!

2.      Manggihatagon siya nga Amahan

“Kamong mga amahan, hatagan ba ninyog bato ang inyong anak kon siya mangayog pan? O hatagan ba ninyog bitin kon mangayog isda? Kon kamo nga mga daotan mahibalong mohatag ug maayong butang ngadto sa inyong mga anak,unsa pa kaha ang inyong Amahan nga atua sa langit? Mohatag gayod siya sa mga maayong butang niadtong mangayo kaniya!”                                     Mateo 7:9-11

3.      Nagapanalipod siya nga Amahan

“Ang akong Amahan, nga maoy naghatag nila ngari kanako, labaw sa tanan; ug walay makaagaw kanila gikan sa Amahan.”                                 Juan 10:29

4.      Mshigugmaon siya nga Amahan

“Palandonga ninyo unsa kadako ang paghigugma sa Amahan kanato! Gihigugma kita niya pag-ayo nga tungod niini giisip kitang mga anak sa Dios ug kini matuod gayod.”                  1 Juan 3:1

5.      Modisiplina siya nga Amahan

“Antosa ang pagkastigo kaninyo ingon nga kini gikan sa inyong Amahan, kay nagpaila kini nga giisip kamo sa Dios nga iyang mga anak. May anak ba god nga dili kastigohon sa iyang amahan? Kon kamo dili kastigohon sama sa gihimo sa Dios sa tanan niyang mga anak, nan dili kamo tinuod nga mga anak niya kondili mga pinaagkan. Kon ang atong mga tawhanong amahan nagkastigo kanato ug gihatod ta gihapon sila, labi pang dawaton nato ang pagkastigo sa atong espirituhanong Amahan aron makabaton kitag kinabuhi….nagbuhat niini ang Dios alang sa atong kaugalingong kaayohan aron makaambit kita sa iyang pagkabalaan. Kon kastigohon kita, makasubo kini kanato inay makalipay. Apan sa kaulahian kadtong nakadawat sa maong pagpanton makaani sa kinabuhing matarong ug ganting malinawon.”                    Hebreo 12:7-11

UNSAY MGA BENEPISYO KUNG IMONG MAILHAN ANG DIOS ISIP AMAHAN?

1.      Pag-ila kung kinsa kita (Identity)

Kung atong mailhan kinsa ang Dios ato usang mailhan kung kinsa kita. Kung ang Dios atong Amahan kita usab iyang mga anak. Dinha ni Kristo nahimo kitang mga anak sa Dios u gang Dios nahimong atong Amahan (Juan 1:12-13; Galacia 3:26).

2.      Pagbaton ug bili sa kaugalingon (self worth)

Kung atong nasabtan nga ang atong Amahan nahigugma pag-ayo kanato kita usab kahibalo na mohigugma sa atong kaugalingon (1 Juan 3:1). Kinahanglan tan-awon nato ang atong kaugalingon sama nga kita gitan-aw sa atong Langitnong  Amahan. Bililhon ug importante kita sa iyang atubangan!

3.      Kasigurohan (security)

Makabaton kita ug kasigurohan kung atong masabtan nga ang atong Amahan malipay nga mohatag kanato sa tanang makaayo kanato (Lukas 12:32; Roma 8:32). Wala kitay kabalaka ug kaguol sama sa bata nga nakig-uban sa iyang amahan. Gitagbo man gani niya ang mga panginahanglanon sa mga langgam ug mga tanom kita pa kaha nga iyang mga anak (Mateo 6:25-33)

Ang problema sa ubang mga anak sa Dios wala sila sa sulod sa panimalay sa ilang amahan busa ilang nahiagoman ang daghang mga kalisdanan ug kasamok (Lukas 15:13-16). Kinahanglan sila mahigmata ug mobalik sa panimalay sa ilang Amahan (kabubut-on sa Dios) aron ilang masinatianang presensiya sa Amahan, ang kabag-ohan sa kinabuhi (maanindot nga bisti), ang awtoridad sa Dios (singsing), ang ministeryo (sapatos), u gang madagayaong pagtabo sa ilang mga panginahanglanon (nating baka). Ang kasigurohan moabot lang kanato kung kita sa kiliran sa atong Amahan sa langit.

4.      Rason sa pagpangalagad (motivation for service)

Tanang maayong anak gusto molipay sa ilang mga amahan. Si Jesus nagbuhat lang sa hingpit nga kabubut-on sa iyang amahan ug wala nay lain (Juan 4:34; 5:19). Nasayod siya nga pinaagi niini mahimuot ang iyang Amahan (Juan 8:28-29). Kita usab, kinahanglan nga ang atong kalipay mao ang pagpahimuot sa atong Amahan sa langit pinaagi sa pagbuhat sa iyang kabubut-on.

5.      Pagsabot nga adunay panimalay didto sa langit (awareness of a home in heaven)

Karon nga atong nasabtan nga ang Dios usa ka Amahan, ang langit nga mao ang puloy-anan sa mga matarong (Juan 14:2; Filipos 3:20) dili lang usa ka puloy-anan nga puno sa mga maayong butang (house ) kondili usa na ka panimalay nga puno sa gugma (home).

UNSAY ATONG HIMUON ARON MAILHAN ANG DIOS ISIP USA KA AMAHAN?

1. Ingna ang Balaang Espiritu nga ablihan ang imong mga ‘espirituhanong mata’ aron imong Makita ang Dios isip usa ka mahigugmaon ug mayo nga Amahan (Roma 8:15).
2. Sugdi pagtawag ang Dios nga Amahan (Mateo 6:9)
3. Ipalalom  ang imong relasyon kaniya diha sa mga pag-ampo (Mateo 6:6).

UNSAYATONG BANTAYAN SA ATONG RELASYON SA AMAHAN NGA LANGITNON?

1. Bantayi nga dili mapulihan ang imong “paglakaw uban Kaniya” sa imong “pagtrabaho para Kaniya”. Una ang tanan kinahanglan mauna ang lalom nga relasyon sa atong Amahan.
2. Bantayi nga sa imong pagduol kaniya dili mga butang ang sentro kon dili siya. Unaha pagpangita ang iyang presensiya usa ang iyang mga panalangin. Unaha pagpangita ang iyang nawong una ang iyang mga kamot. Relasyon ang iyang gusto, relasyon ang ihatag kaniya. Siya ang unang nahigugma kanato busa balosan usab nato siya ug gugma.

PAG-APLIKAR SA KAUGALINGON:

• Amahan nab a ang atong pagtan-aw sa Dios o Agalon pa? Unsay kalahian sa duha?
• Unsay mga rason nganong ang uban dili makatan-aw sa Dios isip Amahan?