Usa ka dalan

USA KA DALAN

LESSON THREE : SALVATION SERIES

Nakadungog kita niining panultihon nga, “daghan ang dalan paingon sa langit pero mosangko ra gihapon kini ngadto sa usa ka Dios.” Ang uban mosulti nga,”Usa ra ka Dios ang atong gisimba apan lainlain lang ang mga pamaagi sa atong pagduol ngadto kaniya.” Sibo ba kini nga pagtulon-an sa Biblia? Atong tan-awon unsay ginasulti sa pulong sa Dios mahitungod niini.

1.      Si Jesus lang ang ‘dalan’ padulong sa Amahan nga langitnon.

‘Si Jesus mitubag, “Ako ang dalan, ang kamatuoran, u gang kinabuhi; walay makaadto sa Amahan kon dili moagi kanako.’”                                        Juan 14:6

2.      Si Jesus lang ang ‘tigpatunga’ taliwala sa Dios ug sa tawo.

“Kay may usa lamang ka Dios ug usa lamang ang naghiusa sa Dios ug sa mga tawo, ang tawo nga si Kristo Jesus, nga mitugyan sa iyang kaugalingon aron sa pagluwas sa tanang tawo. Kini ang kamatuoran nga luwason sa Dios ang tanang mga tawo sa gitagal nga panahon.”                                                                            1 Timoteo 2:5-6

3.      Si Jesus lang ang ‘pultahan’ diin ang mga tawo makasulod ug maluwas.

“Ako ang pultahan; ang mosulod agi kanako maluwas; mosulod siya ug mogula ug makakaplag siya ug masibsib”                                                      Juan 10:9

4.      Ang ‘pangalang’ Jesus lang maoy gihatag sa Dios aron ang tanan tawo maluwas.

“Ang kaluwasan makaplagan lamang diha kaniya, kay wala nay laing ngalan sa tibuok kalibotan nga gihatag sa Dios ngadto sa katawhan nga makaluwas kanako.”

                                                                                                                       Buhat 4:12

5.      Si Jesus lang ‘ang gipadala sa Amahan’ aron ang tanang tawo makabaton ug kinabuhing walay kataposan.

“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak aron ang tanan nga motuo kaniya dili mamatay, kondili makabaton hinuon sa kinabuhing dayon.”                                             Juan 3: 16

Ang Biblia nagtudlo nga si Jesus lang ang dalan, pultahan ug tulay paingon sa Amahan. Wlay makaadto ug mahiusa  sa Dios gawas kon moagi kaniya. Walay kaluwasan gawas kang Jesu-Kristo! Siya lang ang nagpakamatay sa krus para maluwas ang tanang tawo sa kalibotan. Dili tinuod nga daghan ug dalan paingon sa Dios. Usa lang ang dalan, si JESUS. Bug-at kini nga pagtulon-an pero mao kini ang kamatuoran nga ginatudlo sa pulong sa Dios.

LIMA KA LAKANG ARON MAKABATON KA UG KALUWASAN

1.      Angkona nga ikaw usa ka makasasala (pagpaubos).

“Kon moingon kita nga wala kitay sala, gilimbongan nato ang atong kaugalingon ug wala kanato ang kamatuoran. Kon Moingon kita nga wala kita makasala, gipakabakakon nato ang Dios ug wala nato dawata ang iyang pulong.”   1 Juan 1:8,10

2.      Pangayo ug pasaylo sa imong mga sala ngadto sa Dios (pagkompisal)

“Apan kon isugid nato sa Dios ang atong mga sala, tumanon niya ang iyang saad ug buhaton ang matarong ug mopasaylo gayod sa tanan tang mga sala ug maghinlo sa tanan tang mga kalapasan                                                      1 Juan 1:9

3.      Isalikway ang imong mga sala (paghinulsol)

“…pabiyaa ang mga daotan sa ilang sala ug ipasalikway sa mga makasasala ang ilang daotoang hunahuna. Pabalika sila sa Ginoo aron kaloy-an sila, pabalika sa atong Dios, kay andam siya sa pagpasaylo.”

4.      Tuohi nga ang Dios moluwas kanimo pinaagi sa iyang grasya (pagtuo)

“Kay nagpadayag ang Dios sa iyang grasya alang sa kaluwasayn sa tanang tawo.”                             

                                                                                                                 Tito 2:11

Ang pasabot sa “grasya” mao nga “”nakadawat kita ug pabor nga dili angayan moabot kanato”. Kamatayon ang angay kanato tungod sa atong mga sala apan ang Dios naghatag kanato ug libre nga gasa sa kaluwasan dinha ni Kristo Jesus. Atong nadawat ang kabaliktaran sa atong angay madawat. Mao kini ang grasya! Ang kaluwasan naggikan sa Dios ug wala naggikan sa tawo. Nag-ingon ang Biblia,”Naluwas kamo tungod sa grasya sa Dios” (Efeso 2:5). Kinahanglan tuohan ta kini nga pamaagi sa pagluwas kanato nga mga makasasala.

5.      Dawata si Kristo nga Ginoo nganha sa imong kasingkasing (pagtugyan)

“Sanglit gidawat na man ninyo nga Ginoo si Kristo Jesus, pagkinabuhi kamo nga hiniusa kaniya.”                                                                     Colosas 2:6

Kinahanglan dawaton nato si Jesu-Kristo nga atong Ginoo ug manluluwas sulod sa atong kasingkasing. Unsa kita makalakaw uban kaniya kinahanglan ato usa siyang papuy-on sa atong mga kinabuhi. Mosulod siya pinaagi sa iyang Balaang Espiritu kung ato siyang imbitaron pinaagi sa pag-ampo. “Mao kini ang takna sa pagdawat sa kaluoy sa Dios; Karon mao ang adlaw sa kaluwasan!” (2 Corinto 6:2)

PAG-APLIKAR SA KAUGALINGON:

·         Andam ka naba motugyan sa imong kinabuhi ngadto kaniya?

·         Andam ka naba maghinulsol ug modawat sa iyang grasya?

·         Andam ka naba modawat sa iyang libre nga kaluwasan?