KALUWASAN: MAWALA BA O DILI NA?

KALUWASAN: MAWALA BA O DILI NA?

LESSON FIVE: SALVATION SERIES

DUHA KA SAYOP NGA PAGTULON-AN MAHITUNGOD SA KALUWASAN

i.                    Ang kaluwasan nga imong nadawat gikan sa Dios dali kayo mawala

Luwas ka karon tungod sa imong pagtuo kang Jesus apan kung makasala ka ugma kini nga kaluwasan mawala dayon. Busa kinahanglan ka na usab ka modawat kang Ginoong Jesus aron mabalik kini nga kaluwasan diha kanimo. Kini nga pagtulon-an sayop.

ii.                  Ang kaluwasan nga imong nadawat gikan sa Dios dili na gyud mawala.

Nagtudlo kini nga kung luwas ka na luwas ka na gayod hangtod sa kahangtoran bisan ug mobalik ka sa imong karaang kinabuhi sa pagpakasala (backslide). Sayop gihapon kini nga pagtulon-an.

ANG SAKTO UG BALANSE NGA PAGTULON-AN ANAA SA TUNGATUNGA SA DUHA.

1.      Kung luwas ka na “ dili dali mawala “ ang imong kaluwasan nga na batonan.

Kung kita mga anak na sa Dios dili dayon mawala ang atong pagka-anak sa Dios. Sa dihang makasala kita maputol ang atong pakigdait (fellowship) sa Dios apan dili dayon maputol ang atong relasyon (relationship) kaniya. Adunay duha ka rason nganong magpakasala pa ang usa ka Kristohanon:

i.                    Luwas na pero bata pa nga Kristohanon (1 Corito 3:1-4).

ii.                  Luwas na ug miagi na ug paghamtong pero mitalikod sa Dios ug mibalik sa pagpakasala (2 Pedro 2:20-22). Gitawag kini siya ug “backsliders” (Ezequiel 18:24-26).

Kadaghanan sa mga sala nga atong nabuhat human kita naluwas bunga sa atong pagkabata pa diha sa Ginoo ug dili tungod kay nagrebelde kita kaniya. Kadaghanan sa mga Kristohanon mga bata pa sa Ginoo mao nga ang ilang mga kinabuhi ug kinaiya mura pa gihapon ug mga tawo nga anaa sa kalibotan. Duha ka rason nganong mga bata pa sila diha sa Ginoo:

i.                    Wala sila maatiman sa usa ka espirituhanon nga amahan.

Aron sakto ang atong pagtubo kinahanglan kita mosabmitar ngadto sa usa ka “espirituhanon nga amahan” aron kita maatiman ug masangkap (2 Timoteo 2:2; 1 Corinto 4:14-17)

ii.                  Aron sila magbaton ug pagdisiplina sa ilang kaugalingon.

Aron kita motubo kinahanglan kita moampo, mobasa sa Biblia, mosimba, magbalaan, moalagad ug moapil sa mga panagtigom. Kini nagkinahanglan ug “pagdisiplina sa kaugalingon”.

Ang Dios determinado kayo nga motapos unsay iyang gisugdan sa atong kinabuhi (Filipos 1:6). Bisan pa ug motalikod kita sa Ginoo (backslide) dili gihapon siya moundang pagpangita ug paagi aron kita mobalik ngadto kaniya. Kung mobalik gyud kita sa pagpakasala ang Diyos…

a)      Magpadala ug mga tawo nga modasig, momaymay, ug mobadlong kanato.

b)      Magpadala ug bagyo (problema) pagpahigmata kanato (Jonas 1:4-15).

c)      Mobisita kanato pinaagi sa mga damgo, panan-awon ug sa iyang presensiya.

d)     Modisiplina kanato aron mobalik kita ngadto kaniya (Hebreo 12: 5-11).

Komitado ang amahan nga mobuhat sa iyang parte aron matuman ang iyang plano nganhi sa atong kinabuhi (Juan 10:29). Busa ato sang buhaton ang atong parte pinaagi sa “pagtuman kaniya”

2.      Ang kaluwasan nga imong nadawat “adunay posibilidad nga mawala”.

“Kay wala nay bisan unsang sakripisyo nga makawagtang sa mga sala kon tuyoon gayod nato ang pagpakasala human ipahibalo kanato ang kamatuoran. Hinunua, kahadlokan nato ang mahitabo unya: ang Paghukom ug ang mabangis nga kalayo nga molaglag sa misukol sa Dios!”                                               Hebreo 10:26-27

Tinuod nga luwas na kita dinha ni Kristo pero ang amga bersikulo sa itaas nagsulti nga puwede mawala ang atong kaluwasan kung mobalik kita sa pagpakasala (tinuyo nga pagpuyo sa sala). Niini, ang Dios lang ang makahukom kung  kanus-a niya taktakon ang usa ka rebelde sa iyang pamilya. Nag-ingon ang Biblia sa Hebreo 10:29 nga silotan sa Dios ang mga magtutuo nga mibalik pagpuyo sa pagpakasala tungod sa tulo ka butang nga iyang nahimo:

i.        Iyang natamay ug giyatakan ang Anak sa Dios nga nagluwas kaniya.

ii.      Iyang gipakawalay bili ang dugo nga naghinlo kaniya gikan sa tanang sala.

iii.    Iyang nabugalbugalan ang Balaang Espiritu nga nagpuyo kaniya.

MGA BERSIKULO SA BIBLIA DIIN PUWEDE MAWALA ANG ATONG KALUWASAN

Ang Gipadayag 3:4-5 nagsulti nga puwede matangtang ang atong pangalan sa libro sa kinabuhi kung kita dili magpuyo nga madaogon batok sa sala. Kini usa ka sala (Santiago 4:17).

Ang Mateo 24:9-13 naghisgot nga sa kataposang mga adlaw ‘adunay mga magtutuo nga mobiya sa Ginoo’ tungod sa kagubot ug sa pag-uswag sa sala sa kalibotan.

Si Ginoong Jesus nagtudlo ug tulo ka parabolo sa tibuok kapitulo sa Mateo 25 nga naghisgot sa mga magtutuo nga nangalaglag tungod sa ilang sala sa ‘walay pagpakabana’. Wala silay gibuhat bisan ug nasayod na sila unsay angay nilang buhaton. Kini usa ka dako nga sala atubangan sa Dios (Santiago 4:17).

Ang sanga nga anaa na sa punoan pero dili mamunga putlon (Juan 15:1-2). Dili igo nga mabutang kita sa punoan “kiinahanglan magpabilin kita aron mamunga” ug dili maputol. (Juan 15:5-6).

Si Apostol Pablo nagsulat sa Iglesia sa Galacia ug sa Roma nga, kinahanglan magkinabuhi sila sa Espiritu Santo ug dili sa makasasala nga kinaiya aron masiguro nila ang kinabuhi nga walay kataposan (Galacia 5:16-21, 6:7-8;Roma 8:13).

Si Apostol Pablo midisiplina sa iyang unod (tawhanong kinaiya) kay basin ug ang iyang giwalihan malangit ug siya dili (1 Corinto 9:27).

KARON NGA LUWAS NA KITA UNSAY ATONG BUHATON KUNG MAKASALA KITA?

Dili plano sa Amahan nga makasala kita, apan kon kita maksala moduol kita kaniya pinaagi kang Jesus nga atong Manlalaban (1 Juan 2:1). Uban sa mahinulsolon nga kasingkasing atong isugid ang atong mga sala aron kita mapasaylo ug mahinloan (1 Juan 1:9). Dili dayon mawala ang atong ‘kaluwasan’ kun kita makasala, apan ayaw pagpabaya, kung adunay sala nga ginapakita sa Espiritu Santo hinulsoli dayon kini. Ayaw pagpuyo ug sala sa imong kasingkasing. (Roma 6:12-14) Ayaw hugawi ang templo sa Dios (1 Corinto 3:16-17).

PAG-APLIKAR NGA MGA PANGUTANA:

Andam ba kita mosabmitar sa Dios aron kita makapamunga sibo sa iyang gusto ug plano?

Unsay atong buhaton aron dili kita makasinati ug “backslide”? (share)